ST. THOMAS VOICE

ക്രിസ്മസ് നിറവിൽ

- അനീന നിഷാദ്

ഒരു ക്രിസ്മസ്ദിനവും പുതുവര്ഷവും കടന്നു വരുന്ന നാളുകളാണ് അടുത്ത് വരുന്നത്. എന്നാൽ ലോകത്തു സന്തോഷത്തിന്റെയും സമാധാനത്തിന്റെയും ദിനങ്ങൾ വിരളമാണിപ്പോൾ. എങ്ങും ഭൂകമ്പം, യുദ്ധശ്രുതി, മഹാമാരി, സാംക്രമിക രോഗങ്ങൾ, പരസ്പരം തമ്മിലടിക്കുന്ന വ്യക്തി ജീവിതങ്ങൾ, എവിടെയും അസ്വസ്ഥതയും അസമാധാനവും കൊണ്ട് കലുഷിതമായിരിക്കുന്നു. ഇവിടെ വി. ലൂക്കോസിന്റെ സുവിശേഷം 2: 14 ആം വാക്യത്തിന് ഏറെ പ്രസക്തി ഉണ്ട്. " അത്യുന്നതങ്ങളിൽ ദൈവത്തിനു മഹത്വം, ഭൂമിയിൽ ദൈവപ്രസാദമുള്ള മനുഷ്യർക്കു സമാധാനം ". കാലിത്തൊഴുത്തിൽ പിറന്ന യേശുവിന്റെ സന്നിധെ വന്നു സ്വർഗീയ സൈന്യത്തിന്റെ ഒരു സംഘം ആലപിക്കുന്ന സ്തുതിഗീതമാണിത്. ഇവിടെ സമാധാനം അർഹിക്കുന്നത് ദൈവ സാന്നിധ്യമുള്ള മനുഷ്യർക്കാണ്. ദൈവീക സാന്നിധ്യത്തിലൂടെ മാത്രമേ സമാധാനം കൈവരിക്കുവാൻ സാധിക്കുകയുള്ളു എന്ന് നാമെല്ലാരും തിരിച്ചറിയേണ്ടത് അനിവാര്യമാണ്. സദ്ജന സമ്പർക്കം ഒരുവനെ നല്ലവനാക്കുന്നു അതുപോലെ ദൈവവുമായുള്ള ബന്ധം മനുഷ്യനെ പൂർണനും പരിശുദ്ധനുമാക്കുന്നു. കർത്താവുമായുള്ള ബന്ധം സഖായിയെ ഒരു പൂർണ മനുഷ്യനാക്കി മാറ്റുന്നു. സഖായിയുടെ ജീവിതത്തിൽ നിത്യമായ ആനന്ദവും, സന്തോഷവും, സമാധാനവും കണ്ടെത്തുന്നത് ദൈവവുമായുള്ള ബന്ധത്തിലാണ്. സമ്പത്തിന്റെ സമൃദ്ധിയിലല്ല മനുഷ്യ ജീവൻ നിലനിൽക്കുന്നത് എന്ന തിരിച്ചറിവ് സഖായി ലോകത്തെ വിളിച്ചറിയിക്കുന്നതായി വി. ഗ്രന്ഥം പറയുന്നു. അങ്ങനെ ജീവിതത്തിൽ നിത്യമായ ആനന്ദവും സന്തോഷവും സഖായി കരഗതമാക്കുന്നു.

"പിതാവേ നീ ദൈവത്വം പ്രാപിച്ചു വരുമ്പോൾ എന്നെയും ഓർക്കേണമേ എന്ന് " കാൽവരിയിലെ തസ്കരന്റെ വിലാപവും ദൈവിക സാന്നിദ്യം കൊണ്ടുണ്ടായതാണ്. കർത്താവു കാൽവരിയിൽ രണ്ടു കള്ളന്മാരുടെ മദ്ധ്യേ ക്രൂശിക്കപ്പെട്ടപ്പോൾ അതിൽ ഒരുവന്റെ ശ്രദ്ധ മുഴുവൻ ക്രിസ്തുവിലായിരുന്നു. ജഗത്ഗുരുവിന്റെ സഹനം, ക്ഷമിക്കാനുള്ള മനസ്, തന്റെ സഹജീവികളോടുള്ള കരുതൽ, നിർഭയത്വം, ഇതെല്ലം ഇ കള്ളനിൽ പരിവർത്തനമുണ്ടാക്കി. മരണശിക്ഷ അനുഭവിക്കുന്ന സമയത്തും അവനിൽ ആത്മസംതൃപ്തിയും പ്രത്യാശയും ദർശിക്കുവാൻ കഴിയുന്നത് യേശുവുമായുള്ള ബന്ധത്തിലാണ്. എന്നാൽ ലോകപ്രകാരം മാത്രം ചിന്തിക്കുന്ന ഒരാൾക്ക് ഇ ആനന്ദവും, സന്തോഷവും ലഭിക്കണമെന്നില്ല. ലോകം തരുന്ന സന്തോഷം അത് നൈമിഷികവും നശ്വരവുമാണ്. എന്നാൽ ദൈവികമായ സമാധാനം അത് നിത്യവും, അനശ്വരവുമാണ് (യോഹ. 14: 27) സമാധാനം ഞാൻ നിങ്ങൾക്കു തരുന്നു. എന്റെ സമാധാനം ഞാൻ നിങ്ങൾക്കു തരുന്നു. ലോകം തരുന്നത് പോലെയല്ല ഞാൻ നിങ്ങൾക്കു തരുന്നത്. നിങ്ങളുടെ ഹൃദയം കലങ്ങി പോകരുത്, ഭ്രമിക്കുകയുമരുത്. നിത്യജീവൻ പ്രാപിക്കുവാൻ വന്ന പ്രമാണിയോട് യേശു പറയുന്നു (ലുക്കോ. 18:22) ''നിനക്കൊരു കുറവുണ്ട്”. ദിവ്യവും ശാശ്വതവുമായ സമാധാനം നമുക്കു ലഭ്യമാകുന്നില്ല. അത് നമ്മളിലെ വലിയൊരു കുറവ് കൊണ്ടാണ് അത് സമ്പത്തിന്റെ പ്രവർത്തികളാണ്. (ഗലാത്യർ 5:20) അശുദ്ധി, വിഗ്രഹാരാധന, ആഭിചാരം, വ്യഭിചാരം, ശത്രുത, കലഹം, കോപം, സ്വാർത്ഥത, വിദ്വേഷം, മദ്യപാനം എന്നിവ സമ്പത്തിന്റെ പ്രവർത്തികളാണ്. നമ്മുടെ സമാധാനം നഷ്ടപ്പെടുത്തുന്നതും ഇവയൊക്കെ കൊണ്ട്തന്നെയാണ്. സമാധാനത്തിനായി നാം ക്രിസ്തുവിലാകണം. ഒരുവൻ ക്രിസ്തുവിലായാൽ പുതിയ സൃഷ്ടിയായി, പഴയതു കഴിഞ്ഞു പോയി എന്ന് വി. ബൈബിൾ നമ്മളെ പഠിപ്പിക്കുന്നു. ദൈവവുമായി നാം ബന്ധത്തിലാകുമ്പോൾ (ഗലാത്യർ 5:22) സ്നേഹം, ആനന്ദം, സമാധാനം, ക്ഷമ, കരുണ, നന്മ, വിശ്വസ്തത, സൗമ്യത എന്നെ ആത്മാവിന്റെ സല്ഫലങ്ങൾ ഉൾക്കൊണ്ടുകൊണ്ട് പൂർണ മനുഷ്യനാകുന്നു. അതിനാൽ വരുന്ന ക്രിസ്മസ് പുതുവർഷ ദിനങ്ങൾ ദൈവവുമായി ബന്ധപ്പെടുന്നതിനുള്ളതായിരിക്കണം. അങ്ങനെ നിത്യമായ ആനന്ദവും സന്തോഷവും സമാധാനവും നമുക്ക് സ്വന്തമാക്കാം എല്ലാ ദൈവ വിശ്വാസികൾക്കും സന്തോഷത്തിന്റെയും സമാധാനത്തിന്റെയും പ്രത്യാശയുടെയും ക്രിസ്മസ് പുതുവർഷ ആശംസകൾ നേരുന്നു. ദൈവത്തിരുനാമം മഹത്വപ്പെടട്ടെ...